Навоий шаҳар ҳокими М.М.Базаровнинг Ватан ҳимоячилари куни муносабати билан байрам табриги

Ҳурматли Қуролли Кучларимиз аскар ва сержантлари, зобит ва фахрийлари!

Авваламбор, барчангизни мамлакатимиз тарихида унутилмас ва қутлуғ сана - Ватан ҳимоячилари куни ҳамда Ўзбекистон Республикаси Қуролли Кучлари ташкил топганлигининг 30 йиллиги муносабати билан чин қалбимдан самимий табриклайман.

Барчангизга маълумки, мустақиллик йилларида мамлакатимиз мудофаа соҳасини чуқур ислоҳ қилиш, Ватанимиз хавфсизлиги ва барқарорлиги, унинг сарҳадлари дахлсизлигини таъминлаш борасида улкан ишлар амалга оширилди.

Энг асосийси, ҳар қандай стратегик вазифаларни самарали ҳал этишга қодир бўлган профессионал, ихчам, тезкор ва жанговор миллий армиямиз ташкил этилди.

Ўзбекистон Қуролли Кучларида хизмат қилаётган, ҳаётимиз осудалиги, осмонимиз мусаффолиги, оилаларимизнинг тинч ва фаровонлигини таъминлаётган юксак малакали, фидойи, мард ва жасур ўғлонларимиз билан ҳар қанча фахрлансак арзийди.

Куни –кеча Ўзбекистон Республикаси Президенти, Қуролли Кучлар Олий Бош қўмондони Шавкат Мирзиёев раислигида Қуролли Кучлар ва ҳарбий-маъмурий секторлар фаолиятининг 2021 йил якунлари ҳамда 2022 йилга устувор вазифаларга бағишланган Хавфсизлик кенгашининг кенгайтирилган йиғилиши бўлиб ўтди.

Давлатимиз раҳбари томонидан олиб борилаётган ислоҳотлар натижасида мамлакатимиз хавфсизлиги ва халқимиз осойишталигини таъминлашга қодир бўлган, ҳар томонлама замонавий қуролланган, қудратли армиямиз шаклланмоқда.

"Биз 2016 йилда Қуролли Кучларимиз фаолиятини чуқур ўрганган ҳолда, ҳарбий қурилишнинг барча йўналишлари бўйича муҳим қарорлар қабул қилдик. Ва беш йиллик истиқболга мўлжалланган, кечиктириб бўлмайдиган комплекс чораларни кўрдик. Аниқ мақсадга қаратилган ана шундай ишлар натижасида, армиямиз қиёфаси ҳам, ҳарбий хизматнинг маъно-мазмуни ҳам тубдан ўзгармоқда. Қўшинларнинг жанговар шайлиги ва тайёргарлик даражаси кескин ошмоқда”,- деб таъкидладилар давлатимиз раҳбари.

Айни пайтда миллий армиямиз нафақат Ватанимиз чегараларини, халқимизнинг тинч ва осойишта ҳаётини ҳимоя қилмоқда, балки мустаҳкам ирода, мустақил фикрлаш қобилияти шаклланадиган, жисмоний чиниқиш ва юксак инсоний фазилатлар камол топадиган ҳақиқий мактабга айланди.   

Бугунги кунда минтақамизда ва ён-атрофимиздаги мураккаб вазиятлар, турли таҳдид ва хавф-хатарлар нафақат Қуролли Кучларимиз хизматчиларидан балки барчамиздан доимий огоҳ бўлишни, юртимиз сарҳадларини мустаҳкам қўриқлашни, муқаддас бурчга содиқ қолишни, Ватан ҳимоясига қалқон бўлишни талаб этишини ҳеч қачон унутмаслигимиз лозим.

Ватанимизни кўз қорачиғидек асраб-авайлаш, юрт сарҳадларини ишончли ва сергак ҳимоя қилиш, тинчлик ва осойишталигимиз барқарорлигини таъминлаш барчамизнинг муқаддас бурчимиздир.

Бугун юртимизда ҳарбий хизматчиларни ижтимоий ҳимоя қилиш, уларни турар-жойлар билан таъминлаш, муддатли ҳарбий хизматни ўтаган аскарларга имтиёзлар бериш борасида олиб борилаётган ишлар нафақат йигитларимиз қалбида армияда хизмат қилиш ҳиссини кучайтирмоқда, балки бу муқаддас бурч улар учун юксак шон-шарафга ҳам айланмоқда.

Зеро, бугун миллий армиямиз — бизнинг фахримиз ва ғуруримиздир.

Азиз дўстлар!

Фурсатдан фойдаланиб, Сизларни яна бир бор қутлуғ сана - Ватан ҳимоячилари куни ҳамда Қуролли кучларимиз ташкил этилганлигининг 30 йиллиги билан чин юракдан самимий табриклайман.

Барчангизга мустаҳкам сиҳат-саломатлик, баркамоллик, бахту саодат, Ватанимиз тинчлиги йўлидаги шарафли ишларингизга омадлар тилайман.

Байрамингиз муборак бўлсин!