“Соғлом бола йили” Давлат дастури доирасида она ва бола муҳофазаси билан боғлиқ масалаларни ёритишда ОАВ салоҳиятини кучайтириш” лойиҳасига бағишланган семинар “Камилла” меҳмонхонасининг анжуманлар залида бўлиб ўтди.

Ўзбекистон мустақил босма ОАВ ва ахборот агентликларини қўллаб-қувватлаш ва ривожлантириш жамоат фонди, ЮНИСЕФ ва халқаро журналистларни қайта тайёрлаш маркази  ҳамкорлигида ўтказилган мазкур тадбирда оналар ва болалар саломатлигини муҳофаза қилиш ҳамда аҳолининг ҳуқуқий маданияти ва онгини ошириш борасида батафсил сўз юритилди.

– Соғлом бола дунёга келиши учун, аввало, она саломат бўлиши лозим, – дейди вилоят “Она ва бола скрининг” маркази директори Маҳфуза Ҳамроева. – Бўлажак оналарга эътибор қаратиб, уларни асраб-авайлаш ҳар бир хонадон эгаларининг бурчи ҳисобланади. Ўзбек оиласида келинга яхши муносабатда бўлиш, уни парваришлаш лозимки, у руҳий тушкунликка тушмасин, жисмонан мадорсиз бўлиб қолмасин. Ҳомиладор аёлларни ҳар томонлама қўллаб-қувватласак, жамиятда соғлом болалар туғилади.  

Шунингдек, семинарда мустақиллик йилларида мамлакатимизда кўплаб ихтисослаштирилган тиббий масканлар барпо этилганлиги, аёллар соғлигини мустаҳкамлашга жиддий эътибор берилаётганлиги ҳақида ҳам айтиб ўтилди.