Навоий шаҳридаги “Фарҳод” маданият саройининг мажлислар залида халқ депутатлари Навоий вилояти, туман ва шаҳар Кенгашларининг вилоятимиздан Ўзбекистон Республикаси Олий Мажлиси Сенати аъзоларини сайлаш юзасидан қўшма мажлиси бўлиб ўтди.

Йиғилишда дастлаб Ўзбекистон Республикасининг Сайлов қонунчилиги асосида маҳаллий Кенгашлар депутатлари орасидан Ўзбекистон Республикаси Олий Мажлиси Сенати аъзолигига номзодларни кўрсатиш бўйича Оқсоқоллар Кенгаши тузилди.

Шундан сўнг мазкур Кенгаш томонидан тавсия этилган номзодларнинг сайлови ўтказилди.

Яширин овоз бериш натижаларига кўра Томди туманидаги “Керизбулоқ” ширкат хўжалиги бошқаруви раиси Алим Мелиқулов (“Курмантай” сайлов округи), Кармана туманидаги 4-умумтаълим мактаби директори Гулчеҳра Сатторова (“Янгиариқ” сайлов округи), Навоий вилояти ҳокими Эркинжон Турдимов (“Ўзбекистон” сайлов округи), Нурота тумани ҳокими Қобил Турсунов (“Ғозғон” сайлов округи), Учқудуқ тумани ҳокими Фахриддин Умаров (“Алтинтау” сайлов округи) ҳамда вилоят фермерлар Кенгаши раиси Исомиддин Ўроқов (“Олчин” сайлов округи)лар Ўзбекистон Республикаси Олий мажлиси Сенати аъзолари этиб сайланди.

Қўшма йиғилишда Ўзбекистон Республикаси Марказий сайлов комиссияси котибиятининг бошлиғи Комилжон Одилов иштирок этди ва сўзга чиқди.