Шу оддийлик бахш этган фахру ифтихорни бугун Навоий шаҳрида яшаётган ҳар бир фуқаро ҳис этаётган бўлса ажабмас. Чунки буни шоир ҳайкали пойига гул қўйиб, ўз эҳтиромини изҳор этаётган зиёлилар, ёшларнинг юз-кўзларидан уқиб олиш мумкин. Буюк аллома Алишер Навоий таваллудининг 574 йиллиги муносабати билан ўтказилаётган тантаналарнинг аввали шоирнинг шаҳар маданият ва истироҳат боғига ўрнатилган ҳайкали пойига вилоят ҳокими Эркинжон Турдимов бошчилигида гулчамбар қўйиш билан бошланди. Бу ерда жам бўлган вилоят ва шаҳар ташкилотлари раҳбарлари, талаба ёшлар, коллеж ва лицейлар ўқувчилари улуғ мутафаккир хотирасини ёд этишди. Ўша куни тадбирнинг бадиий қисми шоирнинг қаҳрамони номини шарафлаб турган муҳташам "Фарҳод” маданият саройида бўлиб ўтди. Унда шоир сиймосини улуғлашга, унинг асарларини ўрганишга ҳамда бу зот номи ва амалларига муносиб бўлишга чорловчи адабий- бадиий дастур намойиш этилди. Байрам тадбири Навоий ғазаллари ва унга басталанган куй-қўшиқлар билан давом этди. Шу куни шаҳримизнинг таълим даргоҳлари ва корхонаю ташкилотларида бу санага бағишланган байрам тадбирлари, шеърият кечалари ва учрашувлар бўлиб ўтди.