Тадбирга Меҳрибонлик уйи тарбияланувчилари, ота-она қарамоғидан маҳрум бўлган болалар, кам таъминланган оилалар, юртимиз тинчлиги ва халқимиз осойишталиги йўлида хизмат чоғида ҳалок бўлган ҳарбий хизматчилар ва ички ишлар ходимларининг фарзандлари таклиф этилди. 

Ўзбекистон Бадиий академияси раиси А.Нуриддинов ва бошқалар мамлакатимизда ёш авлод камолоти йўлида кўрсатилаётган доимий эътибор ва ғамхўрлик юксак самаралар бераётганини таъкидлади. 

Улкан арча атрофида жам бўлган болажонлар учун Янги йил томошалари намойиш этилди. Театрлаштирилган саҳналар, болалар ижросидаги шеър ва қўшиқлар байрамга янада файз бағишлади. Кўзларида қувонч порлаб турган болаларга Президент совғалари топширилди. 

– Ҳар йили ташкил этиладиган "Президент арчаси” тантаналарини орзиқиб кутамиз, – дейди Навоий шаҳридаги 18-умумтаълим мактаби ўқувчиси Мария Ошувалова. – Чунки бу байрамда Президентимизнинг бизга атаб юборган совғасини оламиз. Биз ҳам шунга муносиб бўлишга ҳаракат қилмоқдамиз. Масалан, 2016 йилда "Камалак” жилоси” кўрик-танловининг мамлакат босқичида иккинчи ўринни эгалладим. Келажакда Ватанимиз тараққиётига муносиб ҳисса қўшишни мақсад қилганман. 

Тадбирда Навоий вилояти ҳокими Қ.Турсунов сўзга чиқди.